එක්සත් අරාබි එමීර් රාජ්‍යයේදී පැවැත්වෙන 11 වැනි ආසියානු කුසලාන වයස අවුරුදු 19න් පහළ ක්‍රිකට් තරගාවලියේ ශ්‍රී ලංකාව මුහුණදෙන තවත් තරගයක් හෙට (3දා) පැවැත්වීමට නියමිතව තිබේ.
ඩුබායි ජාත්‍යන්තර ක්‍රිකට් ක්‍රීඩාංගණයේදී අද පෙරවරු 10.30ට මෙම තරගය ආරම්භ වීමට නියමිතය. එහිදී මෙතෙක් තරගාවලියේ අපරාජිත ශ්‍රී ලංකා කණ්ඩායම සමගින් තරග බිමට පිවිසීමට නියමිතව ඇත්තේ බංග්ලාදේශ වයස අවුරුදු 19න් පහළ කණ්ඩායමයි. කෙසේ වෙතත් වයස අවුරුදු 19න් පහළ ආසියානු කුසලානයේ මූලික වටයේ ‘බී’ කාණ්ඩයෙන් ශ්‍රී ලංකා යොවුන් පිල මුහුණදෙන අවසන් තරගය මෙයයි.
මේ වන විට තරගාවලියේ ශ්‍රී ලංකාව මුහුණදුන් තරග දෙකම ජයගනිමින් ‘බී’ කාණ්ඩ ප්‍රසාද ලකුණු සටහනේ පෙරමුණ ගෙන ඇති ශ්‍රී ලංකා යොවුන් පිල අවසන් පූර්ව වටයේ තම ස්ථානය ද වෙන්කරගෙන අවසන්ය.
එනම් මෙම තරගාවලියේ මූලික වටයේ ශ්‍රී ලංකා වයස අවුරුදු 19න් පහළ කණ්ඩායම මුහුණදුන් පළමු තරගයෙන් නේපාල යොවුන් කණ්ඩායමට එරෙහිව ලකුණු 55ක පහසු ජයක් හිමිකර ගත්තේය. ඉන් අනතුරුව පෙරේදා (1දා) ඇෆ්ගනිස්තාන යොවුන් කණ්ඩායම සමඟින් පැවැති තරගයෙන් ද ලකුණු 131ක දැවැන්ත ජයක් හිමිකර ගත්තේ ශ්‍රී ලංකා යොවුන් කණ්ඩායමයි. එහිදී සුපිරි පිතිකරණයක නිරත වූ කඩුලු රකින ක්‍රීඩක ශනූජන් ශන්මුගනාදන් පන්දු 132ක දී ලකුණු 102ක් රැස්කර ගත්තේය.
මෙවර වයස අවුරුදු 19න් පහළ ආසියානු කුසලානයේදී මූලික වටයේ ‘ඒ’ සහ ‘බී’ වශයෙන් කාණ්ඩ 2ක් යටතේ තරග පැවැත්වේ. එහි ‘ඒ’ කාණ්ඩය සඳහා ඉන්දියාව, පාකිස්තානය, එක්සත් අරාබි එමීර් රාජ්‍යය සහ ජපානය ඇතුළත්ව තිබේ. බංග්ලාදේශය, ශ්‍රී ලංකාව, ඇෆ්ගනිස්තානය සහ නේපාලය ‘බී’ කාණ්ඩය සඳහා ඇතුළත්ය.
මෙවර යොවුන් ආසියානු කුසලාන එක්දින ක්‍රිකට් තරගාවලියේ පළමු අවසන් පූර්ව තරගය දෙසැම්බර් මස 6 වැනිදා ඩුබායිහිදී පැවැත්වෙනු ඇත. දෙවැනි අවසන් පූර්ව තරගය පැවැත්වීමට නියමිතව ඇත්තේ එදිනම සාජාහිදීය. මූලික වටයේ එක් එක් කාණ්ඩයන්හි ප්‍රසාද ලකුණු සටහනේ පෙරමුණ හිමිකර ගන්නා කණ්ඩායම් අවසන් පූර්ව වටයට සුදුසුකම් ලබා ගනු ඇත. මෙම තරගාවලියේ අවසන් මහා තරගය පැවැත්වීමට සැළසුම් කර ඇත්තේ දෙසැම්බර් මස 8 වැනිදා ඩුබායිහිදීය.
මේ අතර යොවුන් ආසියානු කුසලානයේදී ශ්‍රී ලංකා යොවුන් කණ්ඩායම මෙහෙයැවීමේ වගකීම හිමිව ඇත්තේ කොළඹ තර්ස්ටන් විදුහලෙන් බිහිවූ දකුණත් දඟ පන්දු යවන ක්‍රීඩක විහස් තෙව්මිකටයි. කෙසේ වෙතත් මෙම සංචිතය සඳහා දකුණු අප්‍රිකාවේදී පැවැති යොවුන් ලෝක කුසලානය නියෝජනය කළ ශනූජන් ෂන්මුගනාදන් සහ පුළිඳු පෙරේරාද ඇතුළත් කර තිබීම විශේෂත්වයකි.
ශ්‍රී ලංකා සංචිතය - විහස් තෙව්මික (නායක), පුලිඳු පෙරේරා, තනුජ රාජපක්ෂ, දුල්නිත් සිගේරා, ලක්වින් අබේසිංහ, විමත් දින්සර, රමිරු පෙරේරා, කවිජ ගමගේ, විරාන් චමුදිත, ප්‍රවීන් මනීෂ, යෙනුල දෙව්තුස, ශනූජන් ෂන්මුගනාදන්, නිව්ටන් රාජ්කුමාර්, කුගාදස් මතුලන්, ගීතික ද සිල්වා
