19න් පහළ කාන්තා ක්‍රිකට් ලෝක කුසලාන තරගාවලියේ සුපිරි හය වටයේ ශ්‍රී ලංකාව තරග වැදුනු අවසන් තරගය අද (29දා) මැලේසියාවේ බංගී ක්‍රීඩාංගණයේදී පැවැත්විණි. ඔස්ටේ්‍රලියාවට එරෙහිව පැවැති එම තරගයෙන් ශ්‍රී ලංකාව ලකුණු 12ක ජයක් ලැබුවේය.

තරගයේ කාසියේ වාසිය දිනූ ශ්‍රී ලංකා කණ්ඩායම නියමිත පන්දුවාර 20 අවසානයේ කඩුලු‍ 8ක් දැවී ලකුණු 99ක් ලබා ගත්හ. එහිදී ආරම්භක පිතිකාරිනියන් වූ සංජනා කාවින්දි ලකුණු 19ක්ද සුමුදු නිසංසලා ලකුණු 18ක්ද නායිකා මනුදි නානායක්කාර ලකුණු 15ක්ද හිරුණි හංසිකා ලකුණු 14ක්ද ලබා ගත්හ. නමුත් අනතුරුව පිටියට පැමිණි මැද පෙළ පිතිකාරිනියන් ඇතුළු කිසිවකුට ලකුණු 10 සීමාවට ළං වීමට හෝ නොහැකි වීම විශේෂත්වයකි. ඔස්ට්‍රේලියාව වෙනුවෙන් ලිලී බෙසින්ගායිග්විත් කඩුලු‍ 3ක් ද ටේගාන් විලියම්සන් සහ හස්රට් ගිල් කඩුලු‍ 2 බැගින්ද දවා ගත්හ. අනතුරුව පිළිතුරු ඉනිම ක්‍රීඩා කළ ඔස්ටේ්‍රලියානු කණ්ඩායම නියමිත පන්දුවාර 20 අවසානයේ කඩුලු‍ 8ක් දැවී ලබා ගත්තේ ලකුණු 87ක් පමණී. එහිදී කොයිම්හේ බ්‍රායි ලකුණු 27ක්ද එලීනෝ ලාරෝසා ලකුණු 18ක්ද ලබා ගත්හ. පන්දු යැවීමේදී චමුදි මුණසිංහ, ප්‍රමුදි මෙත්සරා සහ අසෙනි තලගුණේ අතර කඩුලු‍ 2 බැගින් බෙදී ගියේය.
නයිජීරියාව සහ අයර්ලන්තය අතර අද (29දා) පැවැති සුපිරි හය වටයේ තවත් තරගයකදී ලකුණු 6ක තියුණු ජයක් ලබා ගැනීමට නයිජීරියානු පිලට හැකි විය. නයිජීරියාවේ මූලික වටයේ තරගයකදී ප්‍රබල නවසීලන්ත කණ්ඩායමද පරාජය කළේය.
කෙසේ නමුත් මේ වන විට ශ්‍රී ලංකා කණ්ඩායම තරගාවලියෙන් ඉවතට ගොස් ඇති අතර ඔස්ටේ්‍රලියානු කණ්ඩායම අවසන් පූර්ව තරගයට සුදුසුකම් ලබා තිබේ. මූලික වටයේ ශ්‍රී ලංකාව සහභාගී වූ පළමු තරගය ස්කොට්ලන්තය සමඟ පැවැත්වුණු අතර එම තරගය වර්ෂාව හේතුවෙන් අත්හැර දැමීමට සිදු විය. එම අවාසිය නොවන්නට ශ්‍රී ලංකා කණ්ඩායමට තරගාවලියේ අවසන් පූර්ව වටයට සුදුසුකම් ලැබීමට ඉඩ ප්‍රස්ථාවක් විය. තරගාවලියේ පළමු අවසන් පූර්ව තරගය දකුණු අප්‍රිකාව සහ ඔස්ටේ්‍රලියාව අතරත් දෙවැනි අවසන් පූර්ව තරගය ඉන්දියාව සහ එංගලන්තය අතර අනිද්දා (31දා) පැවැත්වීමට නියමිතය. අවසන් තරගය පෙබරවාරි 2 වැනිදාත් පැවැත්වීමට නියමිතය.

ශ්‍රී ලංකාව - 99 - 8 (20) සංජනා කාවින්දි 19, සුමුදු නිසංසකා 18, මනුදි නානායක්කාර 15, ලිලී  බෙසින්ගායිග්විත් 7-3
ඔස්ටේ්‍රලියාව - 87-8 (20) කොයිම්හේ බ්‍රායි 27, එලීනෝ ලාරෝසා 18, චමුදි මුණසිංහ 13-2, ප්‍රමුදි මෙත්සරා 16-2, අසෙනි තලගුණේ 18-2