ඕස්ටේ්‍රලියානු කණ්ඩායමේ ශ්‍රී ලංකා තරග සංචාරයට අදාළව පැවැත්වෙන වෝන් - මුරලි කුසලාන ටෙස්ට් තරගාවලියේ පළමු ටෙස්ට් තරගයේ අද (29දා) පළමු දිනය නිමාවන විට ඕස්ටේ්‍රලියාව කඩුලු 2කට ලකුණු 330ක් ලබා ශක්තිමත් ස්ථානයක පසු විය. 

ගාල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වෙන මෙම තරගයේ කාසියේ වාසිය දිනූ ඕස්ටේ්‍රලියානු කණ්ඩායමේ වැඩ බලන නායක ස්ටීවන් ස්මිත් දෙවරක් නොසිතාම පළමුව ලකුණු රැස්කිරීමට තීරණය කළේය. කෙසේ වෙතත් මෙම තරගයේ දී වමත් පිතිකරු ට්‍රැවිස් හෙඩ්, උස්මාන් කවාජා සමඟින් ඕස්ටේ්‍රලියානු ඉනිම ආරම්භ කළ අතර එම තීරණයට වඩාත් සාධාරණයක් ඉටු කරමින් සාර්ථක ආරම්භයක් ලඟා කර ගැනීමට ඔවුන් දෙදෙනාට හැකි විය.  

එහිදී ශ්‍රී ලංකා පන්දු යවන්නන් අනුකම්පා විරහිත ප්‍රහාරයකට ලක් කළ හෙඩ් සිය අර්ධ ශතකය වාර්තා කරගනු ලැබූයේ පන්දු 35ක් පමණක් වැය කරමින් වීම කැපී පෙනිණි. ඒ අනුව හෙඩ් සහ කවාජා ඕස්ටේ්‍රලියානු පළමු කඩුල්ල වෙනුවෙන් ලකුණු 92ක් එක් කළ අතර ට්‍රැවිස් හෙඩ් තම ටෙස්ට් දිවියේ 18 වැනි අර්ධ ශතකය වාර්තා කිරීමෙන් අනතුරුව ලකුණු 57කට පළමු කඩුල්ල ලෙස දැවී ගියේය. 

මානස් ලැබුස්චේන්ට රැස්කරගත හැකි වූයේ ලකුණු 20ක් පමණි. ජෙෆ්රි වැන්ඩර්සේගේ පන්දුවක් හමුවේ ස්ලිප්හි පන්දු රකිමින් සිටි ධනංජය ද සිල්වා අතට උඩපන්දුවක් ලබා දෙමින් ලැබුස්චේන් දැවී ගියේය. 

එම දැවී යෑමෙන් අනතුරුව පිටියට පිවිසි ස්ටීවන් ස්මිත් කවාජා සමඟින් ඕස්ටේ්‍රලියානු ඉනිමේ 3 වැනි කඩුල්ල වෙනුවෙන් නොබිඳුනු ලකුණු 195ක දැවැන්ත සම්බන්ධතාවයක් ගොඩනැගීය. ඒ අතර ටෙස්ට් දිවියේ ලකුණු 10000 සීමාව පසු කිරීමට ස්ටීවන් ස්මිත් සමත් විය. එම දස්කම දැක්වූ ලොව 15 වැනි ක්‍රීඩකයා ලෙසත් ඕස්ටේ්‍රලියාව වෙනුවෙන් එම දස්කම දැක්වූ සිවු වැනි ක්‍රීඩකයා ලෙසත් ස්මිත් මෙහිදී වාර්තා අතරට එක් විය. 

එසේම උස්මාන් කවාජාට ද තම ටෙස්ට් දිවියේ 16 වැනි ශතකය වාර්තා කිරීමට කවාජාට හැකියාව ලැබිණි. ඔහු වාර්තා අතරට එක් වූයේ ටෙස්ට් තරගයකදී ශ්‍රී ලංකාවට එරෙහිව ශතකයක් වාර්තා කළ වයස්ගතම පිතිකරුවා ලෙසිනි. එසේම නායකත්වයේ වගකීම නිසි පරිදි ඉටු කළ ස්ටීවන් ස්මිත් සිය ටෙස්ට් දිවියේ 35 වැනි ශතකය ද අද වාර්තා කළේය. 

කෙසේ වෙතත් ඕස්ටේ්‍රලියානු පළමු ඉනිමේ 81වැනි පන්දුවාරයේදී ඇදහැළුණු වර්ශාව හේතුවෙන් පළමු දිනය සඳහා තරගය නතර කිරීමට විනිසුරුවන් තීරණය කළහ. ඒ අවස්ථාව වන විට උස්මාන් කවාජා නොදැවී ලකුණු 147ක් සහ ස්ටීවන් ස්මිත් නොදැවී ලකුණු 104ක් ලබා සිටියේය. 

කෙසේ වෙතත් මෙම තරගයේ අවස්ථා කිහිපයකදී ඕස්ටේ්‍රලියානු පිතිකරුවන් ලබා දුන් උඩපන්දු ශ්‍රී ලංකා පන්දු රකින්නන් අතින් ගිළිහී යන අයුරු දැකගත හැකි විය. මෙම තරගයේදී ජොෂ් ඉංග්ලිෂ් ඕස්ටේ්‍රලියාව වෙනුවෙන් ජාත්‍යන්තර ටෙස්ට් වරම් හිමිකර ගැනීම ද විශේෂත්වයකි. 

ලකුණු සාරාංශය 

ඕස්ටේ්‍රලියා පළමු ඉනිම - 330/2 (81.1) (උස්මාන් කවාජා නොදැවී 147, ස්ටීවන් ස්මිත් නොදැවී 104, ට්‍රැවිස් හෙඩ් 57, ප්‍රබාත් ජයසූරිය 102/1, ජෙෆ්රි වැන්ඩර්සේ 93/1, අසිත ප්‍රනාන්දු 41/0, නිෂාන් පීරිස් 93/0)