1975 වසරේ පැවැති එක්දින ලෝක කුසලාන තරගාවලියේ 50 වැනි සැමරුම උත්සවාකාරයෙන් සැමරීමට බටහිර ඉන්දිය කොදෙව් ක්‍රිකට් ආයතනය තීරණය කර තිබේ. ඔස්ටේ්‍රලියාව සහ කොදෙව් කණ්ඩායම අතර ජුනි 25 වැනිදා කිංග්ස්ටන් ඕවල්හි ආරම්භ වීමට නියමිත ටෙස්ට් තරගයට සමගාමීව මෙම සැමරුම් උත්සවය බාබඩෝස් නුවරදී පැවැත්වීමට සැලසුම් කර ඇත. 

එංගලන්තයේ ලන්ඩන් නුවර ලෝඩ්ස් ක්‍රීඩාංගණයේදී 1975 ජුනි 21 පැවැත්වුණු පළමු  එක්දින ලෝක කුසලාන තරගාවලියේ අවසන් තරගයේදී කොදෙව් පිල විසින් ඔස්ටේ්‍රලියානු කණ්ඩායම ලකුණු 17කින් පරාජය කළේය. මෙම ලෝක කුසලාන තරගාවලිය පෘඩෙන්ෂල් ලෝක කුසලාන තරගාවලිය නමින් හැඳින්විණි. 1975 ලෝක කුසලානය ජයග්‍රහණය කළ කොදෙව් පිලේ මේ වන විට ජීවතුන් අතර සිටින්නේ ක්‍රීඩකයින් 12 දෙනෙක් පමණී. 

මේ වන විට 73 වැනි වියෙහි පසුවන ගෝර් ඩන් ග්‍රිනිජ්, 76 වැනි වියේ පසුවන ඇල්වින් කලිචරන්, 89 වැනි වියෙහි පසුවන රොහාන් කන්හායි, 80 වැනි වියෙහි පසුවන ක්ලයිව් ලොයිඩ්, 73 වැනි වියෙහි පසුවන විව් රිචඩ්ස්, 75 වැනි වියෙහි පසුවන බර් නාඩ් ජූලියන්, 81 වැනි වියෙහි පසුවන ඩෙරික් මරේ, 79 වැනි වියෙහි පසුවන වැන්බර්න් හෝල්ඩර්, 74 හැවිරිදි ඇන්ඩි රොබට්ස්, 73 හැවිරිදි කොලිස් කිං, 90 හැවිරිදි ලාන්ස් ගිබ්ස් සහ මොරිස් ෆොස්ටර් මෙම සැමරුමට සහභාගී වෙති. මෙම සංචිතයේ සිටි රෝයි ෆෙඩ්රික්ස් 2000 වසරේදීත් කීත් බෝයිස් 1996 වසරේදී මෙලොවින් සමුගත්හ.