ආබාධයකට ලක්වීම හේතුවෙන් දකුණු අප්‍රිකානු වේගපන්දු යවන ක්‍රීඩක ලුන්ගි ඉගිඩිට ශ්‍රී ලංකාව සමඟින් පැවැත්වීමට නියමිත ටෙස්ට් තරගාවලිය අහිමි වන බව වාර්තා වේ.
ඒ අනුව මෙම ආබාධය හේතුවෙන් ඉඟිඩිට එළැඹෙන ජනවාරි මාසය වන තෙක් ක්‍රිකට් ක්‍රීඩාවෙන් ඉවත්ව සිටීමට සිදුව ඇති බව ද සඳහන්ය. එසේම ශ්‍රී ලංකාව සමඟින් පැවැත්වෙන ටෙස්ට් තරගාවලිය මෙන්ම පාකිස්තානය සමඟින් පැවැත්වෙන තරගාවලිය ද ඉඟිඩිට අහිමි වනු ඇත.
මේ අතර දකුණු අප්‍රිකානු නායක ටෙම්බා බවූමාට ද ශ්‍රී ලංකාව සමඟින් පැවැත්වෙන පළමු ටෙස්ට් තරගයට එක්වීමට නොහැකි වන තත්ත්වයක් උද්ගතවී ඇති බව ද එරට ක්‍රිකට් පරිපාලනය නිකුත් කර තිබූ නිවේදනයක දක්වා තිබිණි. බවූමා මුහුණදුන් වමතේ වැළමිටේ ආබාධයෙන් තවමත් පූර්ණ සුවය ලබා නොමැති වීම නිසා මෙම තත්ත්වය ඇති වී තිබ්. ඒ අනුව බවූමා ශ්‍රී ලංකා - දකුණු අප්‍රිකා පළමු ටෙස්ට් තරගයට එක් නොවන නිසා එම තරගයේදී දකුණු අප්‍රිකානු කණ්ඩායම මෙහෙයැවීමේ වගකීම එයිඩන් මාර්කම් වෙත පැවරීමේ වැඩි ඉඩක් තිබෙන බව ද විදෙස් මාධ්‍ය වාර්තා කර තිබිණි.
ශ්‍රී ලංකා කණ්ඩායමේ දකුණු අප්‍රිකා තරග සංචාරයට අදාළව පැවැත්වෙන පළමු ටෙස්ට් තරගය එළැඹෙන 27 වැනිදා ඩර්බන්හිදී ආරම්භ වීමට නියමිතව තිබේ.
